قوماج طبيعي منقي ومبيض

مرحبا بكم فمدونتي مره اخرى تنحب نقدم كل ما هو طبيعي وتجاربي الخاصه والناجحه في ما يخض الجمال .

وهذه المره غادي نقدم ليكم قوماج رائع وسهل و نتائجه سريعة و فعالة جدا .

قوماج السكر و زيت الزيون و عصير الحامض .

*التحضير بسيط و سهل ..

خودي السكر الكميه تقريبا كوب او كأس كبير 

5 معالق كبيره زيت زيتون 

عصير 1 حامضه .

تخلطي الكل و تحطيه فعلبه وكل ما بغيتي تدخلي الحمام عملي بيه قوماج لجسم 

وكذالك كل لليله عملي بيه قوماج لليدين والرجلين .

النتائج ديال هاد القوماج رائعه جدا رغم مكوناته البسيطه وللي فمتناول الجميع
تنقيه البشره من الشوائب + تليين الجلد + تصفيه وتبييض + ترطيب الجلد 

شنو مزال بغيتي احسن بطريقة اسهل  ^^

تنتمنى يعجبكم وتجربوه .... الى اللقاء .

ماسك لتبيض وتنقية البشره رائع جدا ..

السلام عليكم ورحمة الله تعالى وبركاته 
جاييبه ليكم معايا هاد المره ماسك لتبيض وتنقية البشره  اسبوعين  متبعاه وفعلا رائع جدا عجبني بزااف لدرجه مسخيتش نوقفو تنعملو لمده 3 ايام متتاليه فالاسبوع والنتيجه مع اول استعمال و مع المداومه لقيت نتيجه احسن .
عملتو للوجه والعنق و حتى لمنطقة الصدر ...
بيضلي وجهي و رطوبو ليا وحتى العنق كذالك .
منطولش عليكم ....
المكونات 
الخرطال مدقوق - طين ابيض - عسل حر - زيت اللوز المر - ياغورت طبيعي بدون سكر - ماء ورد .

* نعبرو بملعقة صغيره ... 2 معالق ديال ياغورت مسوس - 2 معالق خرطال - نصف ملعقه طين ابيض - ملعقة عسل - ملعقة زيت اللوز المر .

نخلطو كلشي و نديرو القناع فمنطقة الوجه والعنق و الى بغيتو حتى الصدر واليدين و نخليوه حتى ينشف ونزولوه بحركات دائريه منضغطوش بزاف لان الخرطال حرش شويه يقدر يجرح لينا البشره .

 حاولو تسترخو و متحركوش وجهكم حيت هوا تيجبد الوجه.
اتمنى يعجبكم وتجربوه لانه رائع فعلا .

بعد keranove ..spray eclaircissant تجربتي قبل و

بغيت نشاركم كذالك تجربتي مع keranove ...spray eclaircissant .

بنسبه لهذا السبراي ستخدمتو بهدف تفتيح لون شعري بعد ما بهات اللون ديالو لاني كنت صبغاه قبل  وانا لون شعري الاصلي هوا بني مائل لاشقر و حاليا مبغياش نصبغو لانه فعلا محتاج انه يرتاح شويه من الصباغه لهذا اخترت هذا السبراي  باش يفتح لي اللون شويه ويطلع لي لون الصباغه .

السبراي هذا من خلاصة البابونج وكلنا تنعرفو بلي البابونج هوا مفتح رائع للشعر .

وهذه تجربتي مصوره قبل وبعد استخدام السبراي ..

 غسلت شعري و نشفتو و رشيت السبراي عليه هوا تيجي على شكل رشاش رشيت بيه شعري مزيان و خرجت نشفتو فالشمس .

داومت  الطريقه لمدة 3 ايام فقط 

النتيجه واضحه وعجبتني وخصوصا اني معملتش اي صبايغ فقط سبراي بمستخلص البابومج

ماسك منزلي للعناية بالشعر والتخلص من التقصف + زيت استخدمها لشعري

السلام عليكم ...

جيت اشاطركم  بماسك منزلي لشعر + زيوت استخدمها لشعري .. اولا نبدأ ليكم بماسك للعناية بالشعر  وهو ماسك لتقوية الشعر والتخلص من التقصف يليه بعض الزيوت اللي استخدمها لشعري حاليا ...

ماسك الدركة ..

* خل التفاح - دركة - زيت جنين القمح - زيت السمسم  - زيت العود - عسل حر - بيضه بلديه .

الطريقة  بالصور ...

نحاولو نقطعو الدركه مربعات صغيره جدا و نمعسوها مزيان باش  يسهال علينا نطحنوها ..

ناخدو كلشي و نطربوع فالطراب جيدا

وهذا الماسك واجد تيكون لزج بسبب الدرك اللي تطلق فيه واحد المادة لزجه ..

 طبقو  الماسك على شعركم و خليه لمدة نصف يوم او 4 ساعات على الاقل ...

*واحد المعلومه باش يستفد الشعر اكثر من الوصفة خطيوه بالسلوفان نصف المده و عاودو زولو السولفان فنصف المده الاخيره وخليوه معري متخطيوهش تتحسو بيه نشف عاد غسلوه 

النتيجه كانت رائعه و عجبالتني بزاف و عجبني هاد الماسك مع انه كان اول مره تنديرو فيها فعلا رائع تنصح بيه البنات يديروه و الاهم يداومو عليه مره في الاسبوع باش تبان النتيجه اكثر .
 
اما بنسبه لزيوت اللي تنسخدم لشعري حاليا و عجبتني النتيجه ديالهم هي ..
زيت باراشوت + زيت جنين القمح .
تنمزجهم بزوج و ندهن بيهم شعري و ندير ليه مساج خفيف و نمشطو بالمشط الخشبي 
فعلا لاحظت تحسن ملحوظ و اللي عجبني اكثر اني  ملي عملت هاد الزيوت متنحسش بشعري مزيت واخا تندير كميه معقوله تنحس فقط باللمعان و شعري تيبقى مفرود و ممزيتش . 

تجربتي بعد استعمال المشط الخشبي

هذه تجربتي بعد استعمال المشط الخشبي حيت استغنيت تماما من استعمال اي امشاط اخرى ..

المشط الخشبي قريت عليه بزاف فمواضيع على مواقع بالانترنت ..

مؤخرا لقيتو بالصدفه فأحد المعارض و شريتو .. الثمن كان ب 20 درهم فقط ثمنو مناسب ..

مزايا هذا المشط الخشبي اني مبقيتش تنحس بشحنات الكهربائيه اللي تتولي فالشعر بمجرد ما نبدا نمشطو تنسمع  طرطقات بسبب هذه الشحنات الكهربائيه اختفت تماما لما جربت المشط الخشبي ..

وهذه الشحنات الكهربائيه تتسب تقصفات فالشعر مع المده يصبح الشعر متقصف 

قالو انه تيخفف تساقط الشعر مع المداومة بالاستعمال شخصيا مزال ملاحظة هذه النقطه ممكن لاني مزال ما طولت في الاستعمال فقط اسبوعين باش بديتو 

عجبني ايضا لما تنعمل زيون لشعري تيعاوني فهاد العمليه بطريقه جيده بحيت تيوزع الزيوت بكامل الشعر .

عموما اي  ملاحظات غادي نعاود نتكلم فيها مره اخرى و انا فرحانه مبدئيا بهاد المشط و متشجعه نشوف النتائج اللي قريت عليه .

ماء الورد eau de rose سر جمال نساء المغرب ...

حبيت نتكلم ليكم على واحد المنتوج اللي بنسبه لي هوا سر من اسرار الجمال الطبيعي .

ماء الورد . eau de rose

بنسبه لي يعتبر ماء الورد من الضروريات يعني هوا متيخطانيش  و ديما تنديرو سواء في الوصفات او لوحدو

نعيا نعدد بالمزايا ديالو على البشره و العينين و الجسم مزايا وفوائد عديده و كل مره تنكتشف فيه استعمالات اخرى و تنستفد منو اكثر . لهذا تنوصيكم تشريوه ديما يكون عندكم .. قبل كنت تنشريه من المحلات اللي تتبيع المواد الطبيعيه او العطار وفالحقيقه مؤخرا وليت تنحس انه تغير مبقاش كيف الاول ومتنحسش بالمفعول ديالو كيف قبل 

لغاية مقررت نعودنشريه من الصيدليات و فعلا خديتو و لقيتو ماء ورد حقيقي 100/100 

و حسيت بالمفعول ديالو و مزال غادي نحط ليكم بعض الوصفات الطبيعيه فيها ماء الورد .

 ماء الورد خديتو من برافرمسي ب 48 درهم .

وانا حاليا حابه نتبع وصفه كنت قريتها من كتاب قديم لاسرار جمال نساء المغرب 

وهي عباره عن ...
 ماء ورد طبيعي + عسل حر .

يدهن الوجه جيدا بهذا الخليط ويترك ليله كاملة على الوجه و في الغد يشفط بالماء البارد .

وصفة ساهلة جداومتأكده غادي تكون فعالة ان شاء الله .

حاليا انا كل يوم تنعمل ماء ورد قبل ما نعس  ولكن بوحدو تنرشو على الوجه والرقبة و نخليه ينشف بعدها تندير زيت اللوز المر و تنعس بيها و في الغد فعلا تتكون بشرتي كبشره الاطفال تنحس بنعومه و اشراقه زوينه على وجهي .

كريم HYDRA BEAUTY CREME من CHANEL

 السلام عليكم ورحمة الله تعالى وبركاته 

رجعت ليكم مع جديد  مشترياتي من مستحضرات العناية بالبشره و حابة نتكلم ليكم على هاد كريم الترطيب و العناية من شانيل .

خديتو غير البارح وسبب باش خديتو هوا مدح الكثير من الناس ليه بحيت انهم تيقولو بلي هوا عالي الترطيب و تيصلح مشاكل عديده بالبشره و تيعطي اشراقه للوجه و حماية ممتازه كذالك . 

ولهذا ختاريتو نجربو و نشوف الى فعلا النتائج فعالة كيف ما قريت عليه وشفت العديد من البنات عجبهم .

المهم هو كأول استعمال حسيت بيه فعلا نااعم بزاف دغيا تتشربو البشره فعلا ملي درتو دغيا ذاب فالبشره بطريقه سريعه وحسيت بترطيب عالي جدا ودام هذا الترطيب طوال اليوم .

فعلا حسيت براحه حيت جربتو و حسيت ببشرتي منتعشه .

ونتمنى نشوف نتائج اكثر وخصوصا فالاشراقه لانه كيف ما قريت عليه تيعطي اشراقه للوجه وان شاء الله غادي نرجع بعد اسبوعين او اكثر ونقول ليكم النتائج ..

بخصوص الثمن خديتو ب 629 درهم تقريبا