28‏/07‏/2013

اخر مشترياتي للعناية بالبشره و الشعر .

السلام عليكم ورحمة الله وبركاته 

كيف عاملين مع الصيام لاباس ؟؟
المهم اليوما حبيت ندير موضوع على اخر ما خديت من منتوجات للعنايه بالجسم والبشره ان شاء الله تعجبكم ..

يله نبداو بسم الله ..}

البشره 

قوماج و ماسك FFREEMAN 
خديتو بعد ما شفت البنات شكروه بزاف فعلا زوين جربتو هادي 2 مرات و عجبني غير هوا حسيت بلي تينشف البشره شويه خاصكم الى درتوه تدهنو وجهكم مزيان باي زيت ام كريم مرطب وتعملوه مره فالاسبوع انا يمكن حيت عملتو يومين متابعين  غير هذا هوا زوين  وعجبني تيصفي الوجه .




مقشر لازالة الرؤوس السوداء + غسول و مقشر و قناع من .. Garnier pure active
الصراحه انا هاد القوماج ديال Garnier  هوا اللي تبردلي قلبي :) وااعر بجهد تينقي و فايت كتبت عليه موضوع 

Garnier pure active || لتخلص من مشاكل البشرة الذهنية .

كنت خديت غاسول و قوماج ولكن هادو مختلفين على الاولين من ناحية الشكل والتركيبه .
بنسبه لمقشر لازالة الروؤوس السوداء . جربتو زوين غير هوا حسيتو مجهد شويه ولكن النتيجه دييييما رائعه .
اما الغسول و المقشر و القناع 3في1 يعني غسول و مقشر و قوماج فنفس الوقت تقدري تديريه لوجهك وتغسليه و تقدري تديريه كمقشر و حتى تحطيه فوجهك كماسك حتى ينشف و تغسليه و حقيقة منتج رااااااائع جدا عجبني و تيخلي الوجه صاااافي انا تنديرو كماسك تنخليه فوجهي حتى ينشف مزياان و تنغسلو وانا تندلك وجهي تيخرج الوجه غزال ورطب و صافي  وتنصح بيه اللي بشرتو دهنيه حيت تيقلل من البثور .




كريم مرطب NIVEA soft  .. انا وجهي شوية تركيبتو عجيبه غريبه ناشف و دهني يعني فاليوم الواحد نقدر نلقاه دهني واحد الساعه و واحد الساعه تينشف بزاف مفهمتش مناش ولكن انا من النوع اللي بشرتي تتاثر بالعوامل الداخليه هههه سواء الغذاء اللي تناخد او الحالة النفسيه المهم ماعليناش دابا حيت حنا فرمضان والصيام والحرااره وجهي ولالي ناشف بزااااف وخديت لو نيفيا سوفت فايته مجربه وتتعجبني مرطب زوين و ثمنو مناسب واهم حاجه متيضرش البشرة او تيخليها دهنيه تتحسي ببشرتك متوازنه حيت كينين بعض المرطبات اللي مفهتش مالهم !! مثلا الى درتيهم تتحسي بحال الماء تيخرج ليك من المسام او تيخليو الوجه دهني وانا تنكره هادشي فيهم . المهم هاد الكريم زوين وتنصح بيه البنات الي مازال مجربوهش واخا تيبان ليكم عادي راه زوين وغادي يعجبكم ملي تجربوه انا متاكده . تنديرو بزاف فالصباح وتنخلي الكريم المرطب ديال شانيل  حتى لليل تنتكايس عليه ههههه

كريم HYDRA BEAUTY CREME من CHANEL






الشعر 

زيت VatiKa ( باللوز و جوز الهند والسمسم ) .. هاد الزيت غزالة بزاف تتخلي الشعر زوين و رطيطب و تيلمع و مبقيتش تنشوف التقصف ملي بديتها ومبقيت تندير لا سيروم لا والو غير هيا فالكفااايه فهاد الصيف نفعاتني تندهنها لشعري بعد ما نغسلو و  غير شويه فيدي و ندهن ملي تينشف الشعر تينشف وهو رطيطب و سااهل فالمشيط . منتجات فاتيكا تيعجبوني تنستعمل حتى حمام الزيت ديالهم زوييييييييين بزاف حتى هوا .


ULTRA DOUX garnier.. بزيت الاركان وتوت البري ..
طبعا شمبوان ULTRA بلا منشكر فيه هوا شاكر راسو ههههه تناخد قبل ديال الافوكا و دابا جربت هذا فففنن وجميل جدا  .



تنتمنى مشاركتي معاكم لهاد المنتجات عجباتكم هيا منتجات بسيط و لكن زوينه من تجربتي الشخصية ليها . ان شاء الله فمواضيعي الجايه غانتكلم على بعض المنتجات اللي خديت للعنايه بالجسم تابعوني ديما الجديد .
تنتمى تشاركوني ارائكم حاولها قبلاتي للبنات :)

18‏/07‏/2013

l'oreal uv perfect spf50 pa+++ واقي الشمس


طبعا ميمكنش يدوز الصيف وما نفتح موضوع على واقي الشمس :)
شحال من وحده فينا جربات العديد من الماركات باش تحصل على واقي شمس زوين و مناسب
وطبعا بما انه بلادنا تبارك الله الشمس حاره فالصيف فلابد لينا من واقي شمس يكون فعال باش يقينا من الاشعة التحت بنفسجيه
انا شخصيا جربت بزاف دالمنتجات وللاسف ماكانوش يعجبوني 
جربت uriage- avene- vichy- hyseke

مكانوش تيعجبوني بزاف فيهم اللي غلقلي المسام وسبب ليا الرؤوس السوداء و كان ثقيل بزاف على البشره مثل uriage لدرجة انه سبب  ليا فالحبوب .
و منهم اللي زرقني و خلالي لون بشرتي باهت .
ومنهم اللي محسيتش بيه واقي كانو فقط مرطب و صافي .

لكن هاد المره انا راضيه بزاف عن تجربتي مع واقي +++ l'oreal uv perfect spf50 pa


+++ l'oreal uv perfect spf 50 pa


عجبني بزاف وخصوصا انه خلصني من المشاكل اللي تعرضت ليها من قبل ...
 الواقي متيخنقش المسام و تتحسي بترطيب ملي تتستعمليه كانك حطيتي كريم مرطب و فنفس الوقت  واقي فعال ولمدة 12 ساعه.
حست بلي زادني اشراقه فالبشرة .
 فعلا حسيت بيه فعال لاني مؤخرا تعرضت للشمس بزاف و الحمد لله لقيت فيه راحتي بزاف .
الشيئ الوحيد اللي تيعيبو انه فيه 30 مل ممكن الكميه قليله ولكن تنظن انه مع 12 ساعه حمايه تنشوف بلي معقوله وفعلا هادا شهر وهوا عندي ومزال ما كمل .
~
+++ l'oreal uv perfect spf 50 pa

وهادي بعض المعلومات اللي لقيتها عليه فالانترنت قبل منشريه كنت قريت عليه عاد مشيت شريتو وفعلا مكذبوش .

+++ l'oreal uv perfect spf 50 pa
~
    مركز بمركب فعال مضاد للأكسدة.
    يمنح مفعولاً واقياً من الأشعة فوق البنفسجية ويعيق الأضرار الخارجية.
    يحتوي على ميكسوريل إس إكس المضمون وإكس آي لتأمين وقاية من الأشعة فوق البنفسجية (أ) و(ب).
    يقي مظهر البقع البنية واللون الغامق للبشرة والشيخوخة المبكرة.
    يشكل حاجزاً لمقاومة الجذور ووقاية خلايا البشرة
    يمنح نضارة مثل البورسلان للبشرة
~
ايوا شنو تتسناو جربوه مخاصرين والو وتمنو مناسب جدا 89 درهم على ما اظن :).

رمضان كريم وكل عام وانتم بخير ~

السلام عليكم ورحمة الله تعالى وبركاته 

.
 اشكر كل متابعيني فالمدونة وابارك لهم رمضان الله يدخلو عليكم الرحمة و الخير الكثير وعلى جميع المسلمين والمسلمات بالرحمة والمغفره

والله يحمي بلادنا المغرب و يعزها و يعز ملكنا محمد السادس .



~ وكل عام وانتم بخير ~ 

 

ان شالله غادي تلقاو كل خير بهالمدونه من وصفات ونصائح كيف عودتكم دائما كل شيئ يخص النساء ولنساء فقط

:)

 

ولا تحرموني من ردوردكم وتعليقاتكم وانضمامكم للمدونة ~

تحياتي لكم : LALA MIMA

03‏/06‏/2013

قناع الصبار aloé vera لتصفية و نقاء البشره .

اليوم جبتلكم وصفات من نبتة الصبار aloé vera هذه النبته اللي لها فوائد عديده على الشعر والبشرة .. 
كلنا تنعرفو بزاف دالوصفات من نبتة الصبار خاصه بالشعر ولكن متنعرفوش بزاف وصفات خاصة بالبشره لهذا بغيت نقدم لكم وصفة للبشره نتمنى تجربوها وتعجبكم كيف ما عجباتني .

يؤكد الخبراء أن نبات الصبار أو المعروف علمياً باسم الألوفيرا "Aloe Vera" يحتوى على عناصر مغذية مثل فيتامينات ((A.B.C.E ، ومعادن مثل الصوديوم والماغنسيوم والسيلينيوم والبروتينات والأحماض الأمينية والسكريات والزنك.
ويعتبر لحاء الصبار مادة ممتازة للعناية تمنح الشعر قوة ولمعان ملحوظ.


نقدم لكم وصفة للبشره  اللي بهراتني فعلا اول مره  نديرها و تفاجئت بالنتيجه فعلا كانت نتيجيه راائعه نالت على اعجابي بزااف و ناويه نداومها ان شاء الله.

النتيجه : صفاء ملحووظ - توحيد لون البشره - تنقيه البشره من الشوائب .

 * نبتة الصبار aloé vera - عصير 1 حامضه - عسل حر - بودر ارز مطحون - ماء الورد .


بياض البشرة

*نمزجوا جميع المكونات بعد ما نكونو قشرنا الصبار وستخرجنا منو المادة اللزجه و نحاولو نمعسوها مزيان باش تطلق مع المكونات .

بشرة



نعملوا الماسك هذا حتى ينشف على البشره و ملي نزلوه نزولوه وحنا تندلكو كبحال الى تنديرو قوماج للوجه لانه فيه حبيبات الارز و من بعد نغسلو وجهنا بغاسول الخاص بينا .

ملحوظة قبل ما تديري اي ماسك على وجهك لازم يكون رطب ماشي ناشف ولهذا ديري ليه الزيت اي نوع زيوت من الاحسن تكون زيت دهنيه مثل زيت الزيتون او زيت الحبة السوداء دلكي بيها وجهك مزيان ومسحيها بقطن و عاد ديري الماسك و شوفي النتيجه كيف غاتكون نتيجه رائعه و متتحسيش بلي بشرتك نشفات من الماسك.



19‏/05‏/2013

ماسك الخوخ لتفتيح البشره



اليوم حبيت نقدم لكم ماسك الخوخ لتفتيح البشره 
هذا الماسك من المسكات المفضله عندي لانه جد رائع و تتلاحظو التفتيح و النضاره على البشره في وقت سريع بشرط مداومة هذا الماسك لمدة اسبوع دون انقطاع .
الخوخ عنده فوائد عديده منها ...

فيتامين سي C
فيتامين أ A 
 يساعد بتنشيط وترطيب البشرة 
 الخوخ غني باحماض الفواكه  واللذي يوجد باغلب الصالونات والعيادات الطبيه.
وماده اسمها النكتارين اللي يساعد في تقشير البشره وتخلص من الجلد الميت وتجديدها وينعم البشره الجافه ويوحد لون البشره

جربي هذا الماسك لمدة اسبوع 

المكونات 
ملعقة كبيره خرطال 
زيت اللوز المره ومن الاحسن تاخدي لوز مدقوق 
عسل حر 
خوخة مدقوقه جيدا 


تفتيح البشرة



الطريقه تخلطي جميع المكونات و تضعيها على الوجه والعنق و تتركيها حتى تجف جيدا و تحاولين ازاله الماسك بطريقه التقشير 
ودلكي بحركات دائريه بدون الضغط على البشره .
وبعدها تشفطين جيدا بالماء الدافئ 
النتيجه بعد الماسك تلاحظ فوريا و بعد الاستمرار لمدة اسبوع تصبح النتجيه رائعه .
تتفتح البشره والبقع - اختفاء الحمرار و توهج البشره -
نصيحه دائما قومي بوضع الخلطات قبل النوم لكي تستفدين اكثر من الخلطه .

11‏/05‏/2013

اخر مشتريات من المكياج ..



░░░░░░░░░░░░░░░
. · ˙ · . · ˙ · . · ˙ · . · ˙ · . · ˙ · .


مرحبا بيكم مرهة اخرى فمدونتي الخاصه باللغة العربيه واللهجه المغربيه 
هاذ المره حابه نتشارك معاكم مشترياتي من المكياج و ارائي حولها 
نبدأ بسم الله ...

cream concealer shiseido

 الكونسيلر مهم نختاروه بشكل جيد باش منخربوش منطقه حول العينين لان هاد المنطقه جد حساسه ..

concealer shiseido تيليق بزاف للبشره الحساسه ومتخافي منو والو لانو ماركة طبيه .
 اللون اللي فعلا تيغطي الهالات بشكل جيد متخافوش من اللون واخا يجيكم فاتح بزاف حيث تتجربوه تيطلع طبيعي على البشره وتيغطي الهلات لمدة طويله و تيسيحش ولا يعمل لك تكتلات وهذا اللي عجبني فيه اكثر .




Colour Breeze Poudre  البودر هادي ممكن نعطيها 6/10 علاش لانها مارقتليش بزااف محسيتش انها عطاتني شي اضافه على المكياج 
كيف ما تتشوفو فيها 4 الوان ملي تدمجوها بالفرشاة تتعطي لون برونزي باااااهت جدا بالكاااد تقدري تلاحظي  التأثير ديالو 
بنسبه اللي تيبغيو المكياج يجيهم طبيعي تنعتقد بلي غادي تعجبهم هاد البودر .



مشتريات


mascara givenchy نعطيها 10/10 عجباتني بزااااااف 
الماسكرا كيف ما تتشوفو شكلها غير مألوف مكورة فالاول معرفتش كيفاش نستعملها مزيان وليت قلبت فاليوتيوب على الطريقه وفعلا ملي طبقت الطريقه الصحيحه طلعو ليا الرمووووووش الطواال .
تاني حاجه عجباتني فيها ناها متتلزقش متتحسيش بلي انتي حاطه ماسكرا على رموشك






givenchy magic khol  نعطيه 6/10 
 عجبني بزاااف فعينيا ولـــــــــــــكن  متيتبتش فالعين بزاف .
مقارنه بثمنو خاصو يكون تابث ومتيسيحش  . للاسف





fond teint lancome miracle  نعطيه 10/10
هذا بنسبه ليا احسن كريم اساس  للبشره الحساسه واللي خايفه على بشرتها و باغا حاجه مضمونه ومتضرهاش يستخدم هاد كريم الاساس .
و اللي بشرتها شاحبه كذالك تيرجع الوجه بمظهر صحي و اللون طبيعي تتحسو بنضاره فالبشره و تيبقى التأثير على مدار اليوم .




Lancome Blush. رااااااااائع و 100/10

بلاشر راائع فعلا تاثير وردي و لامعان تيضوي الوجه زوين زين بزاف .






30‏/04‏/2013

قوماج طبيعي منقي ومبيض



مرحبا بكم فمدونتي مره اخرى تنحب نقدم كل ما هو طبيعي وتجاربي الخاصه والناجحه في ما يخض الجمال .
وهذه المره غادي نقدم ليكم قوماج رائع وسهل و نتائجه سريعة و فعالة جدا .
قوماج السكر و زيت الزيون و عصير الحامض .

تقشير البشرة
*التحضير بسيط و سهل ..
خودي السكر الكميه تقريبا كوب او كأس كبير 
5 معالق كبيره زيت زيتون 
عصير 1 حامضه .

تدليك البشرة

تخلطي الكل و تحطيه فعلبه وكل ما بغيتي تدخلي الحمام عملي بيه قوماج لجسم 
وكذالك كل لليله عملي بيه قوماج لليدين والرجلين .
النتائج ديال هاد القوماج رائعه جدا رغم مكوناته البسيطه وللي فمتناول الجميع
تنقيه البشره من الشوائب + تليين الجلد + تصفيه وتبييض + ترطيب الجلد 
شنو مزال بغيتي احسن بطريقة اسهل  ^^

تنتمنى يعجبكم وتجربوه .... الى اللقاء .